[gallery]

Hvað: Hamlet litli með sjónlýsingum og skuggatúlkun

Hvenær: Laugardaginn 10. maí klukkan 13.00 (1)

Hvar: Borgarleikhúsinu

Á laugardaginn kemur verður blað brotið í sögu leikhúss á Íslandi. Fimm stjörnu leikritið Hamlet litli mun vera flutt með bæði sjónlýsingum og táknmálstúlkun.

Hægt verður að fá heyrnartól fyrir sjónlýsingarnar en einnig verða þrír táknmálstúlkar sem skuggatúlka hverja og eina persónu verksins. Sýningin er samstarfsverkefni Borgarleikhússins og Listar án landamæra.

Þetta er fjölskyldusýning fyrir ALLA!!!

Sagan - Þegar Hamlet litli missir föður sinn er hann harmi sleginn og fer að haga sér stórfurðulega. Ekki batnar það þegar mamma hans ætlar örfáum dögum eftir útförina að giftast bróður pabba hans – og bróðirinn hefur örugglega eitthvað óhreint í pokahorninu. Óbærilegt verður þó ástandið þegar bestu vinir hans eru fengnir til að njósna um hann. Þau halda öll að hann sé að fara á límingunum. En hver myndi ekki fá að minnsta kosti vægt taugaáfall við þessar aðstæður? 

Verkið - Bergur Þór Ingólfsson, leikstjóri Galdrakarlsins í Oz og Mary Poppins, færir þennan risastóra harmleik á Litla sviðið þar sem sjónarhorni hins litla Hamlets verður beint að áhorfendum. Sorgin yfir föðurmissi, óttinn við að missa móður og brostið traust til vina. Eitt þessara áfalla ætti að vera nóg til að trufla tilfinningalíf fullorðinnar manneskju, hvað þá ungrar sálar. Hér verður þó leikið á als oddi. Hugarheimur barnsins býr yfir ótal verkfærum til að takast á við áföll, sorgir og jafnvel stríð. Það gerir leikhúsið líka.  Bergur fær til liðs við sig tónlistarkonuna Kristjönu Stefánsdóttur en þau áttu einmitt ógleymanlegt samstarf í Galdrakarlinum í Oz sem og verðlaunasýningunni Jesú litla sem hefur verið reglulegur gestur á Litla sviðinu um jólin undanfarin ár.

Aðstandendur Höfundur: Bergur Þór Ingólfsson & hópurinn | Leikstjórn: Bergur Þór Ingólfsson | Leikmynd, búningar & leikbrúðugerð: Sigríður Sunna Reynisdóttir | Lýsing:Garðar Borgþórsson|Tónlist: Kristjana Stefánsdóttir | Hljóð: Ólafur Örn Thoroddsen |  Leikarar: Sigurður Þór Óskarsson, Kristín Þóra Haraldsdóttir & Kristjana Stefánsdóttir 

Miðaverð er aðeins 2.900 krónur og hægt er að kaupa miða á www.borgarleikhus.is á midasala@borgarleikhus.is og í síma 568-8000 eða á www.midi.is